ALIZIA

 

Goizaldeak talka

egin du sudur eta begi

gorriez gainezkatzen

diren zubipeen

kontra.

 

Txakurrak jabeen inguruetan

eta inork nahi ez dituen ortuariak,

alperrik galtzen diren berbak eta

inoren birikietara sartuko ez den arnasa.

 

Irratien berriketa eta aharrausiak.

Etxeko leihatilatik txute mota ezberdinak:

            besoko tipikoa,

            orkatilako ez hain tipikoa,

            hankartekoa, denetan berriztatzaileena,

            mingain azpiko bat, oskarra mereziko lukeena.

 

Erreka alboko eskaileretan

geldi-geldirik

gelditzen dira

argizaiol bako argizariak.

 

Zerraldoginak eta kutxagileak

zeharkale eta zumarkaleetatik

paseatzen dira bien bitartean.

 

 

 

Hauxe bai

Bilboko ispiluaren bestaldean dagoela

Alizia konturatzeko manera.