MAKALIK

                Ecce, quem amas, infirmatur.

                Ara, zuk maite dozun au, makalik dago.

                                              (Joan. XVIII, v. 3)

Jesus! Aita! Egunokaz nago makalik,

Gauza on bat egiteko gogaldi barik.

        Gaubaz ta egunez

Beti dabil larririk nire arimea.

Jesus! Ilgo ete da ba zure semea

        Larritasunez?

Jesus! Zeugana noa ta ez zaite urrundu,

Bada gogoa naiko ein yat illundu...

        Ene! Urrunago

Bazoaz, bear-bada, amatauko yat.

Ia, biotz sutsu orren txinparta argi bat!...

        Ia!... Eske nago.

Tira! Badakit orain zer dan mundua,

Guzurrezko atsegiñez ondo apaindua.

        Poz guzurtiak

Dira bere poz danak. Ai! guzurregaz

Datoz, ta etorri-orduko, igesi ta egaz

        Doaz guztiak.

Ezteutset yarraituko. Beyoaz danok,

Biotza, ai! onen utsik itxi deustenok!

        Eta urrengoan

Agertzean, esango deutset garbiro:

Alde ortik! Ez zaiteze sartu barriro

        Nire gogoan!

Zu barik atsegiña ezta ziurra,

Atsegiña eztalako iñoiz guzurra;

        Ta Zeu bakarrik,.

Jesus, Zeu zara Egia. Zeu, Jesus ona...

A, ezin aurkitu neinke nik zoriona,

        Zu aurkitu barik!

Zeugana noa bada, Jesus maitea,

Ta orratxe daroatsut biotz tristea,

        Biotz galdua,

Munduko guzurrezko atsegiñakaz

Ta onek itxi deutsezan neke danakaz

        Ain makaldua.

Ezteutsut, ez, Aitatxu laztana, itandu

Ta ezteutsut itanduko ia berandu

        Etegoazen...

Zetako? Zeu or zagoz geure begira,

Eta biotzak diñost arbiñik: Tira,

        Tira, goazen!

Tira! Bagoaz ointxe gaixo erkin biok,

Biotz ta arime motel errukarriok,

        Biok Zeugana,

Biok osasun eske, biok batera,

Biok batera eltzeko zeure senera,

        Jesus laztana.

Ai, baila! Zer da au, Jesus? Eztogu indarrik,

Eta norako gara indarrik barik?

        Ene! Ezetara

Ezin gara goratu. Ezin, Jauna, ezin!!

Zer da au? Egorik bako txoriak bezin

        Melgoak gara.

Ekazuz, Aita, egoak! Betor indarra!

Ixuri zeure eskutik aize goitarra,

        Aizetxu orregaz

Goraturik, goyazan gora ta gora,

Osasunaren billa, orra bertora

        Egaz eta egaz!

                        1907-ko urtean