AMAREN ERIOTZAN

Adizkide ona, diñostezu

Aspaldian nagola ixil,

Eta zelan naike nik abestu

Amatxu egin bayat il,

Amatxu egin bayat il?

Euren amatatik aldatzean

Ez dabiltzez arkumeak

Ijutika ta zear-zearka,

Be-beka dabiltz itunak

Be, beka dabiltz itunak.

Niri bere, umetxua nazela,

Neure ama kendu dauste,

Ta augaitik bizi nazen arren

Antzirika ikusko naute,

Antzirika ikusko naute.

Kabin txorikumek pozik dagoz

Gabiraik ama yanarte,

Antziri, gosea, ixil ituna

Gero ariketa illarte,

Gero ariketa illarte.

Ni bere pozik egoten nintzan

Neure amatxun altzoan,

Ordun neuretzat abestutea

Arnasa artutea bai zan,

Arnasa artutea bai zan.

Bere onginaik indartzen nindun

Egoteko beti alai,

Ta bere begitadak beartu

Jarduteko abestiri,

Jarduteko abestiri.

Baña orain eriotz-gabirayak

Eroan daust ama niri,

Ta ni beti goibel oldoztuten

Barriz ama noz ikusi,

Barriz ama noz ikusi.

                        Ondarribi, 1924

A.M.D.G.