Kulitxu seaskan

        Mamiren-mami,

        jainko txiki zu,

amaren argi, zoruna,

        betaxaletan

        giro bezaizu

nere abesti kutuna.

                kun-kun, kun-kun...

        Aldamenean

        nazu biyotxa,

negarrik ez ba, ixo, ixo,

        amatxok gero

        biguin koxua

emango ta egin llo-llo.

                kun-kun, kun-kun...

        Mumua dator...,

        ara...! Joan ortik!;

utikan!, ez urbil geigo!,

        nere txikiya

        pollita da-ta

ez du ñegarrik egingo.

                kun-kun, kun-kun...

        * * *

        Loak artu du...

        Irripar emez

piztu zaio arpegiya.

        aingeruekin

        jolasten dari

maitiño zoragarriya.

        Eragin laztan

        eztitsu batez

biyok amets egin zagun;

        aurtxoak lotan

        eta nik esna...

Orren goxo...! kun-kun, kun-kun...