Lore-jai

Nere gelako leyatillan gaur

argi-jai dute liliak

ta jai eder au osatzearren

txuriz ta gorriz jantziak

irabioka or dabiltz beste

ega-lili dantxariak.

Lili-gañean erle bat orain

ego txabalez jarririk

eztigai ona miazten dago

aren barne xamurretik;

iñork al daki maita badira

berengaiz ezaguturik?

Gora ta bera jai adirazle

lilien aizpa sorgiñak

une bat ere gelditzerik ez

beren jolas egariñak.

Begiko zaizkit txiribili ain

margoztuen jira-birak.

Pinpirin-panpox irradariak,

biotz-biotzez ain bero

jai ontan zuen etorrera nik

abestu detan ezkero

nere gelako leyatillara

erdu zaitezte goizero!