SAN PABLO APOSTOLUAREN
BIGARREN KARTA TIMOTEORI

LENBIZIKO KAPITULUA

        1. Pablo Jesukristoren Apostolua Jaungoikoaren borondateagatik, Jesukristogan daukagun bizitzako eskeñtzaren araura,

        2. Timoteo, nere seme txit maiteari grazia, urrikaltasuna eta pakea Aita Jaungoikoaren, eta Jesukristo gure Jaunaren izenean.

        3. Ematen diozkat eskerrak Jaungoikoari, zeñ serbitzen dedan nere asabaen irudira, anima garbiarekin, gau ta egun, nere orazioetan aspertu gabe, zurekin oroitzen naizala.

        4. Zu ikusi nai zaitudala, oroitzen naizala zure negar malkoakin, elkarri agur egin giñonean Efeson, ni gozotasunez betetzeko.

        5. Daukadala gogoan arako zure fede zintzoa, zeñ lenengo egon zan beti Loide zure Amonagan, eta Eunize zure Amagan, eta orobat zierto nago zugan ere badagoala.

        6. Argatik gogorik bizienarekin esaten dizut, biztu dezazula Jaungoikoaren grazia, nere eskuak gañean jartzeagatik, zugan dagoana.

        7. Zeren ez digu guri Jaungoikoak eman beldurreko espiriturik, baizik sendotasunekoa, eta karidadekoa, eta zentzukoa.

        8. Argatik etzaite lotsatu ematen gure Jaunaren testigantza; ez nerea, bere amorioz kateetan nagoarena; baizik ari zaite lanean nerekin batean Ebanjelioagatik, Jaungoikoagandik artuko dezun bertutearekin:

        9. Zeñak libratu ginduen, eta ots egin zigun bere bokazio santuarekin, ez gure obrakgatik, baizik bere borondate utsagatik, eta Jesukristogan emana izan zagun graziagatik gizaldi guztiak baño lenagotik,

        10. Eta zeñ agertu dan orain Jesukristo gure Salbatzallearen etorreragatik, zeñak eriotza desegin zuen, eta argitara atera zituen bizitza eta illezintasuna Ebanjelioaren bitartez,

        11. Zeñatarako izan nintzan ni jarria erreñuetako predikatzalle, eta Apostolu, eta Erakusle.

        12. Argatik oiek padezitzen ditut, baña ez naiz lotsatzen. Zeren ongi dakidan, zeñgan fiatu naizan; eta zierto nago almentsua dala, nere ordaña gordetzeko atzeneko egun artaraño.

        13. Iduki ezazu irudi ta ispillutzat, nigandik Jesukristogan fede eta karidadearekin aditu dezun dotrina garbia.

        14. Zaitu ezazu gauza on ori, gugan bizi dan Espiritu Santuaren bitartez.

        15. Badakizu nola alde egin duten nigandik Asian jaiotako guztiak, emen Erroman zeudenak, zeñaen artekoak diran Fijelo eta Hermojenes.

        16. Jaunak isuri bitza bere urrikaltasunak Onesifororen etxearen gañera, zeren maiz gozatu nauen, eta nere katearekin ez dan lotsatu:

        17. Baizik allegatu zanean Erromara, bereala ajolaz billatu ninduen, aliketa arkitu ninduen artean.

        18. Jaunak eman dizaiola grazia, bere aurrean urrikaltasuna arkitzeko, juizioko egun andi artan. Zuk ongi dakizu, Efeson zenbat mesede egin zidan.

BIGARREN KAPITULUA

        1. Zu bada, ene semea, alaitu zaite Jesukristogan daukagun grazian.

        2. Eta testigu askoren aurrean neri aditu dizkidazun gauzak, adirazi zazkiezu gizon leial, besteai erakusteko ere egokiak izango diranai.

        3. Ari zaite lanean Jesukristoren gudari ona bezela.

        4. Jaungoikoaren gudarien artean sartu diradenetatik batek ere, ez du nastu bear munduko arazoetan, bere mendean artu zuenaren borondatea egiteko.

        5. Gudatokian gudan ari danak ere ez du koroa artzen, legeen araura gudatzen ez bada.

        6. Nekazariak frutuak artu baño lenago, lanak egin bear ditu.

        7. Ongi aditu itzatzu esaten dizkizudanak, zeren Jaungoikoak gauza guztietan aditza emango dizun.

        8. Oroitu zaite, Jesukristo gure Jauna Dabiden jatorrikoa, illaen artetik biztu zala, nere Ebanjelioaren araura,

        9. Zeñgatik nagoan ni padezitzen, kateen artean ikusi naiten artean, gaiztagilla bat bezela, baña Jaungoikoaren itza ez dago lotua.

        10. Argatik guztia sufritzen det autuen amorioz, berak ere iritxi dezaten salbazioa, Jesukristok irabazia, zeruko gloriarekin.

        11. Da egia txit zierto bat, berarekin iltzen bagera, berarekin biziko ere gerala,

        12. Berarekin padezitzen badegu, berarekin erreñatuko ere degu, ukatzen badegu, orobat berak ere ukatuko gaitu.

        13. Sinistzen ez badegu, berak leial irautzen du, bera ez diteke ukatu.

        14. Gauza oiek erakutsiko dituzu, Jaungoikoa testigutzat jartzen dezula. Etzaite itzez elean ari, zeren ezertarako ere ez duen balio, baizik aditzalleak gaiztotzeko.

        15. Jarri zaite Jaungoikoaren aurrean jartzeko egoeran, bere gogokoa izateko diña dan ministro bat bezela; ezerere egiten ez duena, lotsatzeko bidea emango dionik; eta egiaren itza ongi adiraztzen dakiana.

        16. Argatik alde egin ezazu, izketa mundutar, eta alperretatik, zeren asko laguntzen duten jendea gaiztotzeko.

        17. Eta onelakoen itzaldia minbizia bezela zabaltzen da. Oien artekoak dira Himeneo eta Fileto,

        18. Zeñak alde egin duten egiatik, esaten dutela, biztze berria egina dagoela, eta batzuen fedea galdu dute.

        19. Baña Jaungoikoaren fundamentuak sendo irautzen du, zeñ dagoan markatua itz oiekin: Jaunak, bereak ezagutzen ditu; baitaere Jaunaren izenari otz egin dion guztiak, gaiztakeriatik alde egin beza.

        20. Gañerakoan, etxe andi batean ez bakarrik daude urrezko eta zillarrezko ontziak, baita zurezkoak eta buztiñakoak ere; eta beretatiko batzuek dira onrazko lanetarako; eta beste batzuek lotsarizko lanetarako.

        21. Baldin bada norbait, gauza oietatik garbitzen bada, onrazko ontzi santutu bat izango da, eta Jaunaren serbitzorako gai, obra on guztirako prestatua.

        22. Argatik, gazteen guraetatik iges egin ezazu, eta jarraitu zaiezu justiziari, fedeari, karidadeari, eta pakeari, biotz garbiarekin Jaunari ots egiten diotenakin.

        23. Ezbai eroak, eta adimena argitzeko balio ez dutenetatik, iges egin ezazu, jakinik auzien jatorri ugari bat diradela.

        24. Jaunaren serbitzariari ez dagokio auzitan aritzea, baizik otsana guztiakin, erakutsi onak emateko gai, ta egokia, sufritua.

        25. Egiari kontra egiten diotenai, biguñtasunarekin errierta egin dizaiela, ikusteko Jaungoikoak penitenziara ekartzen ote dituen, egia ezagutu dezaten,

        26. Eta irten ditezen deabruaren lazoetatik, zeñak bere gogo osora lotuak dauzkan.

IRUGARREN KAPITULUA

        1. Jakin bear dezu berriz, atzeneko egunetan denbora perillez beteak etorriko diradela.

        2. Jaikiko dirade gizon, beren buruen maitatzalleak, zikoitzak, antusteak, urugullutsuak, blasfemariak, gurasoai obeditzen ez dienak, eskertxarrekoak, gaiztakinak,

        3. Aberetuak, pakegaiztokoak, gezurasmatzalleak, zikiñak, uzuak, biguñtasunik gabeak,

        4. Lagunsaltzalleak, lotsagaldukoak, arroak, eta Jaungoikoaren maitatzallak baño atsegiñen maitatzallagoak,

        5. Agertzen dutela, bai, oneen irudia; baña bere espirituari utzitzen diotela. Onelakoakgandik iges ezazu.

        6. Zeren oietatikoak diran, etxeetatik sartzen diradenak, eta katibu eramaten dituzte bekatuz betetzeko emakume galduak, gura gaiztoen jarraitzallak.

        7. Zeñak ari diran beti ikasten, eta beñere ez dira allegatzen egiaren ezaguerara.

        8. Atzenean Jannes, eta Manbres, Moisesi aurkeztu zitzaiozkan bezela, era berean oiek egiari aurkeztzen zaiozka; biotz ustelduak dauzkaten gizonak; fedetik igeslariak, besteak ere gaiztotu nai lituzkenak,

        9. Baña ez dute, berak nai dutena iritxiko, zeren beren zentzugabetasuna guztien begien aurrean jarriko da, len Mago aien bezela.

        10. Zuk kontrara egin bear dezu, nere Timoteo maitea, ikusi dezu nere dotrina, nola bizi naizan, zer dan billatzen dedana; nolakoak direan nere fedea, nere animako sendotasuna, nere karidadea, nere pazienzia:

        11. Nolako persekuzioak eta atsekabeak sufritu ditudan, nolako gauzak gertatu zitzazkidan Antiokian, Ikonian, eta Listrisen, nolako persekuzioak sufritu nituen, eta nola guztietatik Jaunak atera ninduen.

        12. Eta gauza jakina da, Jesukristogan ongi bizi nai duten guztiak, persekuzioa irago bearko dutela.

        13. Gizon gaizto ta engañalariak berriz, gaiztotuaz joango dira, utsak egiten dituztela, eta besteai ere utsak egin erazi nai diela.

        14. Zuk berriz, nere seme maitea, iraun ezazu azkar, ta sendo, ikasi dezunean, eta emanak izan zizazkizun erakutsietan, jakinik zeñgandik ikasi dituzun.

        15. Baitaere aur denboratik ikasi ziñituelako liburu santuak, zeñak eman ditzatzukean salbazioarako erakutsiak, Jesukristogan sinistzen duen fedearen bitartez.

        16. Jaungoikoak argituta egindako eskritura guztia da egokia erakusteko, sinistu erazitzeko, bekatariak bide zuzenera ekartzeko; eta onak zuzentzeko justizian eta birtutean.

        17. Jaungoikoaren gizona on osoa izan dedin, eta obra on guztirako egon dedin prestatua.

LAUGARREN KAPITULUA

        1. Txit gogotik bada esaten dizut, Jaungoikoaren, eta Jesukristo, biziak eta illak juzgatuko dituenaren aurrean, bere etorrerako eta bere erreñuko denboran.

        2. Predikatu dezazula Jaungoikoaren itza; ari zatzakio, naiz etorri erara, naiz ez, errierta egin ezazu, erregutu ezazu, esan zaiezu ondu ditezela pazienzia eta dotrina guztiarekin.

        3. Zeren etorriko dan denbora, zeñean gizonak dotrina ona ezin sufrituko duten; baizik, beren gurak asetzeko, billatu ta montoituko dituzten berentzat erakusleak, belarriak gozatzen dituztela,

        4. Eta egiagandik alde eraziko die beren belarriai, eta ipuietara biurtuko dituzte.

        5. Zu berriz beillan zaude, gauza guztietan ari zaite lanean, egin itzatzu Ebanjelari baten bearrak, zure lantegia kunplitu ezazu. Begiratua izan zaite.

        6. Bada ni onezkero sakrifikatua izateko zorian nago, nere eriotzako denbora alderatzen da.

        7. Erruz ta sendo gudatu naiz, nere ibilliak bukatu dirade, leialtasuna zaitu det.

        8. Etzat onezkero beste gauzarik gelditzen, baizik itxedotzea, neretzat gordea dagoan justiziako koroea, zeñ emango didan neri Jaunak egun artan, juez justoa bezela; eta ez bakarrik neri, baita ere fedez beteta, bere etorreraren gurak dauzkatenai. Arin ibilli zaite, agudo nigana etortzeko.

        9. Zeren Demasek utzi nau, mundu au maitatzen duela, eta Tesalonikara joan da.

        10. Kreszente joan zan Galaziarontz, Tito Dalmaziara.

        11. Lukas bakarrik dago nerekin. Artu ezazu Markos, eta zurekin ekarri ezazu, zeren nere lanetarako mesedegarria det.

        12. Tikiko Efesora bialdu det.

        13. Zatozanean ekarri ezazu zurekin, Troaden Karporen etxean utzi nuen kapa, baitaere liburuak, batezere pergaminoak.

        14. Alejandro pertzagilleak, gaitz asko egin dit. Jaunak bere obraen araura, ordaña emango dio.

        15. Kontuan zaude zu ere berarekin, zeren gure erakutsietara txit gogorki aurkeztu dan.

        16. Nere lenengo defensan, iñork ere etzidan lagundu; baizik guztiak utzi ninduten. Jaungoikoari erregutzen diot, arren barkatu dizaiela.

        17. Baña Jaunak lagundu zidan, eta alaitu ninduen, nik nere sermoea bukatu nezan, eta erreñu guztiak aditu zidaten, eta Leoiaren aotik libratua izan nintzan.

        18. Jaunak bekatu guzitik libratuko nau, eta bere zeruko erreñura zuzenduko nau, berari gloria emana izan bizaio mendez mende. Ala izan dedilla.

        19. Eskumuñak Priskari, eta Akilasi, eta Onesifororen familiari.

        20. Erasto Korinto gelditu zan. Eta Trofimo Mileton eria utzi nuen.

        21. Agudo ibilli zaite, negua baño lenago etortzeko. Agur egiten dizute Eubulo eta Pudente, eta Lino eta Klaudia, eta erri onetako anaia guztiak.

        22. Jesukristo Jauna zure espirituarekin izan dedilla. Graziak zuekin iraun dezala. Ala izan dedilla.