Hamaseigerren jelkhaldia

 

Jelkhi Pette, Xaxi, Borttol, Maitena, Eiheralt,

Eiheraltsa, Apheza eta ezteliarrak, esküiñ.

 

        Apheza

Adixkidiak, herrian

boztario handi dügü:

Ohatzeko hor berian

bi gazte ezkuntzen zaizkü.

 

        Pette eta Xaxi

Biak jin gütüzü huna

sakramentiaren galthoz,

Eta azkar maitharzüna

nahi beitügü bethikoz.

 

        Eiheralt

Jaunaren lagünguaren

gure haurrek beharra die,

Orai diren egünetan

galbidetan beitirade.

 

        Eiheraltsa

Bi gazte horik ikhustez

bihotza zait erdiatzen,

Zeren, gü jakile dira,

egün bethikoz jüntatzen.

 

        Maitena

Gihaurk bezala eztie

deüs mentsik Basabürian:

Irus izanen dirade

lanian eta bakian.

 

        Borttol

Jinkuaren aitzinian,

aphezaren aitzinian,

Hi hizate oraidanik

nausia Basabürian.

 

Gük eta zaharrek

etxeki dügün bezala,

Etxaltia behar dükek

hik zaiñkatü hala hala.

 

Eta zü, Xaxi maitia,

zirate etxenko bihotza:

Etxekandere berria,

gureki zure egoitza.

 

Jinkuaren eretzian,

herriaren eretzian,

Güziak gira etxian

algar maithatüko bathian.

 

        Pette

Etxenkuen aitzinian,

ziek oro jakile heben,

Xaxi dit emaztetako

ordian eneki biltzen.

 

        Xaxi

Etxenkuen aitzinian,

ziek oro jakile heben,

Pette dit nik senhartako

ordian eneki biltzen.

 

        Apheza

Bata bestiarentako

bizi zite jüntatürik,

Ta maitha ziztaie

zien lokharriak tinkirik.

 

Ezar erhaztünak.

Sar aiñgüriak eta khanta.

 

Adarxkuan, besten onduan

txilintxau bi sagar gorri;

Udazkenialat dirade

izanen amiragarri.

 

Egün bi senhar emaztek,

beren zaharren ondotik,

Jarraikiren tie ürhatsak

bizitziari lothürik.

 

Aiñgüriak juan.

 

        Apheza

Jinko jaunak zien baimena

orai untsa har dezala,

Eta benediziunia

nasai eman deizaziela.

 

Benedika.

 

In nomine Patris, Filü,

et Spiritu Sancti. Amen.

Jinko Jaunaren grazia

bethik düzie ükhenen.

 

Egin ezteiak.

 

 

Khanta

Oihan beltzian

 

Oihan beltzian zuiñen eijer den osto berdia jelkhitzen;

Han entzün dütüt egün goizian txoriak khantüz erraiten:

Bi bihotz gazte amodiuak egün ditiala jüntatzen;

Boztariutan sarthü niz eta orai hasten niz khantatzen.

 

Espus espuser ororen phartez uhure eta goraintzi,

Egün düzien amodiua bizi zideno ez ützi:

Nahigabetan pharte har eta plazerak ez berantetsi,

Irus izate ederrenian nahi dügü ziten bizi.

 

Espus jaunak elhe bat bera bürian dezala edüki:

Lagüntto horri amodiuaz bethi bihotza eraiki;

Zaharraguer uhure eta haien abisa jarraiki,

Familiako bake hun baten gozatzeko algarreki.

 

Espusa gazte baten erhian zuiñ en eijer erhaztüna!

Harek beitioe muthil gazter: “Etzitaiela ingana:

Senhar hun baten edireiteko egün izan düt fortüna,

Hari emanik bihotza oso bai eta gaztetarzüna.”

 

Txori eijerrak egiten dizü elhorritzian habia:

Espus espusek gazte lagüner eman deie etsenplia,

Berantü gabe ber ürhatsari oro ditian abia,

Baratzen denak üdüri beitü lanthare üzta gabia.

 

Adios zier, espus espusak, üzten zütiet bakian;

Zelüko jaunak lagünt zitzela hartü düzien bidian;

Igarailiak ikhus zitzela urthe zunbaiten bürian,

Amatto haur bat altzuan eta aita laueki lanian.