Seigerren jelkhaldia

 

Jelkhi Ezpondabürü, Xilhanko, Xaxi eta lagünak

esküiñ eta Arotxetx, Intsagostoi, Othexarre, Nabarra eta

etsaiak exker. Ostatian, edarriak mahaiñian.

 

        Nabarra

Herri huntan lagüneki

hau dügü besta gaitza;

Orenari sogin zazie:

hürrün düg orano goiza.

 

Ziek, gizun pottoluak,

bazter zitaie hebentik,

Edari hun horik oro

baitütüt zalhe hüstürik.

 

Edan eta eror moxkor

Pette sar.

 

        Pette

Zer planta dügü heben gaur:

neskatila bat lürrian!

Hau ere thenore huntan

ikhusi behar günian!

 

        Ezpondabürü

Gizuna mozkor delarik

izate itsusian da:

Zer aphaltarzüna aldiz

emaztia ordi bada!

 

        Pette

Lagünt nezazie othoi

amiñi bat jeikarazten.

Kanpo elkhi dügüneko

arauz beita belhitüren.

 

Jeik eta etxek neskatila.

 

        Xilhanko

Albidatik gabe düzü,

oro hüillan deseginik;

Ta mürrütsa ikhustiak

ezarten nizü laztürik.

 

        Intsagostoi

Ziek gure aferetan

ikhustekorik eztüzie;

Neskatila hori arren

bakian ütz ezazie.

 

        Othexarre

Bere nahi eginetan

bakhotxa da bere bürü:

Ordian zer düzie ziek

nahiz südürra hor sarthü?

 

 

Pettek ütz Nabarra.

 

        Pette

Maskaro hiotü tzarrak,

ezdeüsdün olliatak,

Uste dük laket zaiküla

izatia manhatiak?

 

        Xilhanko

Behar zünükeie orok

izan ahalkez betherik:

Nun da zien gizuntarzüna

hola ordi zidelarik?

 

        Arotxetx

Ezpadüzie nahi jakin

zer den gure gozatzia,

Aski düzie hebentik

berhala lekhü hüstia.

 

        Pette

Badakitzagü gük ere

ükhübeillak erabilten

Eta makhila gorriak

firrintan üngürükatzen.

 

Egin güdüka, lagünak, gal eta, ezkapa,

Xaxi elkh.

 

        Othexarre

Gure nahiküntiari

nur othe bühürt lizate?

Lehertürik pharkamentü

bertan galthegin lezake.

 

Eraman Nabarra.

Etsaiak juan.

 

 

Khanta

 

Bat, biga.. .hamar trago,

Gizunak dü edan untsaxko;

Bat, biga.. .hamar trago,

Lagüneki kartakan dago;

Bat, biga.. .hamar trago,

Nun ezten hüstü gehiago.

 

Bat, biga.. .hamar trago,

Galtzera dü gogua oso;

Emaiten dü hordago

Ta mihia lüzatzen zaio:

Xahal saldü khario

Axuriak ere haboro.

 

Bat, biga.. .hamar trago,

Haurrak aspaldian zaizkik lo.

Emaztia aldiz so

Thenoriari gaia oro

Nuiz hitzaien jineko

Goizian ordü dateneko.

 

Bat, biga.. .hamar trago,

Emak hor hola aitzinago!

Bat, biga.. .hamar trago

Axki dük, gizuna; xo!

Bertan hizate khüso,

ezpahiz ere arrunt otso.