Hamabigerren jelkhaldia

 

Jelkhi Xaxi, esküiñ.

 

        Xaxi (mintza edo khanta)

Zer eztitarzüna egün

üda arratsalde huntan;

Oro ixilian dira

txoriak berbera khantan.

 

Sorhuak eta oihanak

zuiñ eder beren berdian!

zereneztüt ikhusi lehen,

heben bizi nintzanian?

 

Sar Pette.

 

        Pette

Bazter eder horier so

harua düzü gozatzen;

Egünko arte hun hunek

khanbio deizü ekharten.

 

        Xaxi

Eztakit batere nula

egon nizan herriz kanpo;

Zer egin nian ordian?

izan nintakian ertzo!

 

        Pette

Ta Basabürüko primak

herria ez dü ahtze;

Segür izaten ahal da,

badüke beste bizitze.

 

Hürrün bizi daitekia,

Ziberuko neskatila,

Bere gogua dialarik

thai gabe bere etxiala?

 

        Xaxi

Nihuiz hanko bizitzia

ez nezake har gogotik!

Arroi :tz bata-bestentako

Ezin egin lagün hunik.

 

        Pette

Bi biak girenez gaiñen,

galtho bat dit egineko:

Zük, Basabürüko prima,

har nezazü nausitako.

 

Ene hasperen handiak

nik zuretako nitizün,

Beithan etxeki düdana

ageraratzen dit egün.

 

        Xaxi

Enetzat maitharzün handi

banakizün bazüniala,

Eta holako galthua

eginen zeneitazüla.

 

Zunbat neskatila dira

hirilat arra-ützüli,

Potiko galthazalerik

eztielakoz ikhusi!

 

Bena ni aiher nündüzün

etzinantiala hola,

Arauz ene baimenaren

ondotik zinantiala.

 

        Pette

Batitzügü, zorigaitzez,

herrian jente gaixtorik;

Bestetarik tützü berhez

oro ürgüillüz betherik.

 

        Xaxi

Etzira horietarik;

ene baimena badüzü;

Bena behar ditzat hortzaz

aitetama elhestatü.