SEI GAZTE

        Sei gazte bihotz bero

                Sei gazte

                Bazizte

Gain huntarat airoski iganak.

Hautsirik estekak, trabak eta oro,

Sei gazte Jainkoari osoki emanak...

        Zoin eder den, zoin sustagarri

                Seien ikustea

Lurreko anaien maitez Jainkoratze ari,

        Zoin eder den ikustea

        Zuen eskaintza osoa,

        Zuen goiz-argi begitartea!

        Hoin da, bai, eder hori

                Hoin sustagarri

        Nun hedoi-artetik

        Xoragarriz xoraturik

        Beha baitago Jainkoa

        Jainko betierekoa,

Xoragarriz, sustagarriz, maitagarriz

                Xoraturik,

        Euskal-gain huntan ikusiz

Sei gazte begiz hoin argi, barnez hoin bero

        Airos ta lorios iganak,

Hautsirik estekak, utzirik trabak, atseginak

        Ontasunak eta oro.

                Sei gazte

        Gain huntarat iganak

Jainkoari oso osoki emanak

        Haren maitatzeko,

        Haren bilatzeko,

Amodioz urtuak zeruratu arte.

15-8-46