AMATU

                        Arreba begi-urdin

                        amatu

Begiak zeruz eta bazterrez

    Gauerakoan aserik,

Egon nitzaitzu, Mayi, nigarrez

    Lilluragarriz urturik.

Itsas-mendien azken dirdira

    Lur-kantuekin batean

Nitan xortaka nigartu dira,

    Eguna izarñotzean...

Gau-hegaletan gogoa joana

    Ez dakit nungo lanora,

Soinu-ke ala amets egina,

    Ni zu-tzen naizen hartara...

Barnean lurren pil pil gozoa,

    Egon naiz egon otoizka,

Zure haurñoa, gure haurñoa

    Nitan sendituz pilpika.

              * * *

Bere barnean haurño bat sendi

    Bere biziaz bizia!

Bere barnean bihotz bat adi

    Bere bihotzak hazia!

Ai! asmatzeko holako boza

    Behar zen segur Jainkoa...

Ai! egiteko holako gauza

    Behar zen Amodioa...

Eskerrak beti-ta betiere

    Esker zoroak Jaunari.

Itsas-irrintzin, Ortzadar-lore

    Zuen bi bihotz maiteri.

Maitez baitira maitez zabaldu

    Jaun Goiko bihotz hartara,

Eta hara nun heldu den heldu

    Amestu dugun haur hura...

              * * *

Oi amodio amodioa.

    Haurtzen zarena ametan,

Zure Jainkozko indar gozoa

    Irakitan dut ni baitan!

Zure egarriz hara lau urte

    Denez nagola hustua...

Euskal-arimak ni baitan daude

    Ni baitan dago mundua.

Oi amodio amodioa,

    Hire min gozoz ez nauke!

Egin nauk eta, nola Jainkoa,

    Ni biziaren sortzaile.

27-11-45