50

Egunaren azken orduan

eskuragaitz egiten zaigun guztia albora genezake

zorigaitz ez izateko arrazoi ulergarria

eskaini ezkero.

Isilpean datozen hitz-gakoei men egingo diegu

atzendutako lagunen izenak gogora ekartzeko

edo abandonatze honen mesedetara makurtu

hareatzan desegindako oinatzak berreskura genitzan,

ezerezaz asebete ez gaitezen

hemendik aurrerako orduetan.

Sar nazakezu zeure berbotsaren epelean,

ezpain gabetuetan,

noragabe egin dezagun are urrunago,

egunsentiak uki daitezkeen zeruertzera,

begizta ditzagun irekitzen diren ateak,

lasterbide oro baztertuz,

astiro,

guregandik urrun hartarako distantzia hausnartzen

behako eroriak hauteman arte.

Ez daukat non erroturik

egunaren azken orduan.