44

Neure baitan bizi zara ahapeka

taupada etsituen esanahia asmatu ezinik,

etengabe saihestuz ataurre erreak,

ezerezaren galdezka, zelatan beti

lorratzen bidean barna,

beharrezkoen zaigun espazioa berrekitera.

Gorputzetik gorputzera egiten dugu hatsalbo,

akorduek utzi barne-mina eragotziz,

saiatu naiz

zure begiradaren amildegia nire galbidea izan ez dadin

ahotik ahorako tarte laburraren menpe nago,

irabaz nahi genituzkeen jomugak ezin lortuz

egiten dugu aurrera

desorduak irentsiz bederazka.

Zure isiltasuna hazkatuko dut

euriaren gainetik.