17

Bakarrik gelditu naiz

eta gauza bakoitza bere galerak darama.

Orain ez nuke asmatuko zure simetria sotil hori

      trazatzen,

ez nintzateke ausartuko esaten egun bakoitza leiho

      irekia denik

ihes egin dezagun inora,

hausturez bizirauten dugunontzat

urruntasuna dugu galbide, urruntasuna bizi-bide,

horregatik uler nezake zure eskuen mintzoa,

zure bihotzaren dardara

baina ez etorri

itxaropen faltsuak berritzera,

iragan garaiak ekartzera,

beti geldituko da zerbait ezabatzeke,

ahaztutako aurpegiren bat gogoratzeke,

eztarrian itotzen diren izenak ahoska ezinez,

zugan ikusi ditut oinazeak urratzen,

zugan aurkitu ditut errendatutako zainak

eta erori egin naiz, ezinbestez

itolarri honen zulora.