7. GRANDE ARCHE DE LA DEFENSE

 

Oi, zein tristea den haurtzaroko

karruselaren bira.

Toki berean beti lurra,

ildo berean musikaren orratza,

ordu berean eguzkiaren ordularia

eta geldoa, geldoa paisaia.

 

Amaitu da dantza aroa

eta dantza aroa berrasi.

Oi zein tristea den haurtzaroa.

Amaitu da dantza aroa

eta dantza aroa berrasi.

 

Kartoizko zalditan esertzen dira zaharrak

kartoi eta pastazko lurrean,

belar berririk ez eta ur

berdinak aho zingiratsuan...

Oi zein tristea den haurtzaroa

zaharren zeru lainotsuan.

 

Eta haurtzarora jotzen dutenean

benetan jotzen dute haurtzaroa...

Haurtzaroa, defentsarik gabea,

haurtzaroa, etengabeko herio zorian.

 

Oi zein tristea den,

zein tristea den gure haurtzaroa.

Amaitu da dantza aroa

eta dantza aroa berrasi.