3. MONTMARTRE — La Place du Theatre

 

Orrazeak, erretratoak,

karbonziloa, oleoa, guraizeak.

 

Le Tire Bouchon tabernatik

piano soinua dator.

Ile luzea

alkondara zuria

zigarro itzalia zintzilik

behatz hegalariak.

 

La Boheme jotzen ari da,

Charles Aznavouren doinua.

Ez dakit Puccinik tokirik ote zukeen

bohemian.

Baina badakit nik ez dudala,

behin behinekoa ez izatekotan.

Ziurtasunean arautu dut bizitza,

egunetik egunerako

ustekabe ezean.

 

Kain suburbano bihurturik nago,

aspalditik ahantzia Burdigalatik Luteziara

zihoan galtzada,

aspalditik galdua

itsasertzetik haruntza doazen

txalupen uhara.

 

Le Tire Bouchonetik

piano doinua dator.

Ulisesek entzun izan balu

ez genukeen jakinen

nor zeukan zain

Itacan