j. LEHEN MINISTRARIAREN BISITA

 

Hiriko giltzak odol herdoiez

zikindurik daude.

Misiletatik erori berri dira

lore kimikoak

eta atera berriak urpeko nuklearretatik

izurriteak dakartzaten

arratoiak.

 

Haurraren oinhutsa dakusat miseriaren

lurrean

eta Somaliako udaren bihotza

estututa neguaren jelateetan.

 

Gerraren hondakinak  desertuko hareetetan,

eta armen industriaren zaldunak

zamalka historiaren bizkarrean.

 

Banda jotzen hasi da.

«The bridge over the river Kwai» ezagutzen dut,

eta The Beatlesen «Strawberry fields for ever».

Marrubiak eta ibaia,

zirko utopietako musika,

herri guztiek dantzari ekin diezaioten

maisu-zartaildunaren agintepean.

 

Askatasun askearen lilura

jaso digute agintari zahar

eta taratu horien banderetan,

 

Eman biezaiete «La Cravate de la Legion d'Honneur»,

baina jakin bezate hiriko giltzak, manejatzen dituztenen

eskuetan, odoleztatuta gelditu direla.