2. SACRE COEUR

 

Jakin nahi nuke ea beltza den

beltzen errosarioa

eta zuriena zuria.

Jakin nahi nuke belauniko dauden beltzak

eta ni zein kolorekoak garen.

Jakin nahi nuke zilarrezko gordeiluan

dagoen ostia xumea

eta kupulako pantokrator izugarria

maitasunaren zein prismetatik

pasa diren.

Jakin nahi nuke zergatik dakidan

zein beharrezkoa den otoitza eta zergatik azken batez

Jainkoak ahozpez maite gaituen.

Jakin nahi nuke zergatik Sacré Coeureko

otoilarien artean

«Nigan sinesten duzu, Jauna»,

bihotzetik irten zaidan,

eta irten hain ozen.