BIZIA ITZALIZ

 

    Bizitzaren epe labur

    misterio kezkagarri,

    halabeharrezko agur...

    Oi, ustekabean

    herio-gauean

    bere legea ezarri.

 

Lurrean daude orbelak

biziaren lorratzak

hezurdura biloizian

zurbildurik zuhaitzak.

Edonon ikus daitezke

Herio-ren oinatzak,

edonon entzun daitezke

haren pausu garratzak.

 

    Bizitzaren epe labur

    misterio kezkagarri,

    halabeharrezko agur...

    Oi, ustekabean

    herio-gauean

    bere legea ezarri.

 

Untzorriz estali dira

horma zahar urtetsuak

kateaturik dauzkate

estu, sare erpetsuak

berde iluna du koroitzat

harresi ohoretsuak.

Haizearen eresia:

hiletako bertsuak.

 

    Bizitzaren epe labur

    misterio kezkagarri,

    halabeharrezko agur...

    Oi, ustekabean

    herio-gauean

    bere legea ezarri.

 

Geriza beltza dakusat

hurbilduz datorrela,

pausuz-pausu besalagun

denborak dakarrela.

Amets bezala badoa

gaztaroa horrela...

badakigu jaioz gero

heriotza zor dela.

 

    Bizitzaren epe labur

    misterio kezkagarri,

    halabeharrezko agur...

    Oi, ustekabean

    herio-gauean

    bere legea ezarri.

 

Denbora zintzelkariak

aitona du makurtu

badirudi jainkoren bat

nahi lukela gurtu

bere tantai-eskultura

kako zaio bihurtu...

Zugan nahi nituzke nik

arbasoak agurtu.

 

    Bizitzaren epe labur

    misterio kezkagarri,

    halabeharrezko agur...

    Oi, ustekabean

    herio-gauean

    bere legea ezarri.

 

Zure aurpegiko markek

haritz sustrai iharrez

ehunduak dirudite,

zakuki idor zakarrez.

Lan eskergaitzaren lorratzak

nabarmendu beharrez

iduneko sare trauskil

zainen zehar-meharrez...

Urre, urtetan urtua,

bazoaz halabeharrez.

 

    Bizitzaren epe labur

    misterio kezkagarri,

    halabeharrezko agur...

    Oi, ustekabean

    herio-gauean

    bere legea ezarri.

 

Arnaspeko hitzak entzunik

etxerantz itun nator;

aitonaren irudiak

maiz jartzen nau pentsakor:

harekin joango baita

euskal sustraiko altxor,

han errauspean dirauen

gure espiritu jator.

 

    Bizitzaren epe labur

    misterio kezkagarri,

    halabeharrezko agur...

    Oi, ustekabean

    herio-gauean

    bere legea ezarri.

 

Hor, bizitzaren borrokan

gure espiritu zahar!

Oraindik dizdizka dago

iraupenaren izar.

Haitzari ura dario,

guri euskal hitz ñabar,

tresna zaharren museoan

ez biezagute sar.

 

    Bizitzaren epe labur

    misterio kezkagarri,

    halabeharrezko agur...

    Oi, ustekabean

    herio-gauean

    bere legea ezarri.