GABONAK HAURREKIN

 

    Ume aldra bat kanta-kantari

    dantza-algaran jostari...

    sehaska biran ekin festari!!!

 

Soinu ozenez kantari

Gabon-kanpaia dilin-dan

hain kaxkarin ta dantzari

bere ardatzaren biran.

Zer den asmatu ezinik

denak haren ikusmiran,

metal-ahotsez arrenka

dio: «zatozte segiran»!

 

Argiz dizdizka kaleak

dena kolorezko dantza,

sartu-irtenga dendetan

janari ta txanpon-saltsa.

Salerosketa gorantza

gizatasuna beherantza,

Gabon-giroak ez al du

azoka haundi baten antza???

 

             * * *

 

Negu buru-urdinak

goialdetik irri

elurrak agur xuriz

bihotzean zirri.

Abendu giro

Gabon pozkiro

kanpoan hozkirri;

Eguberri-haizea

guretzat ze berri?

 

Ilunaren kolkoan

keinuz izar xuri

azken esperantzaren

irriño iduri.

Bihotz lauean

Gabon gauean

bakea ixuri

zorionaren bila

gabiltza urduri.

 

Tan-tan! Gabon alaia

deika atez-ate

Euskal etxe guztiek

onartu bezate.

Xamurtasuna

ta nortasuna

da zure izate,

zurekin etor bedi

zerutiko bake.

 

Barne-taupada goxoz

kantuz eztarriak

egunotan ditugu

bihotzak jarriak.

Ongi etorri

amets-iturri

Oi Eguberriak!

zugan aseko dira

gure egarriak.

 

Belengo izarño batek

maitezko dizdira

begi-keiñuen jokoz

dantzatzen ari da.

Gabon garaiak

festa alaiak

atarian dira;

pozaren oihartzuna

betor gure herrira!

 

Etxolatxo ttikian

han da kumatxoa,

haren gordairua da

Jesus umetxoa.

Euskal bertsotan

bihotz hotsetan

eman nahi «patxoa»;

polliki loratu du

irriparretxoa.