IPARRAGIRRE AMAZULO...?

 

Mugarriak gaindituz

mentura beharra

mundu ezezagunen

erakar indarra.

 

Gitarrari zerion

tristura dardara

negu gau luzeetan

zotin ta ikara

xoko gorde batetan

ama ta euskara.

Orain ustegabean

pozezko algara:

semearen hurbiltzez

amaren zirrara.

 

Hego-haize arminez

asekaitz barrua

lur berrien irrikaz

gogoa azkortua,

eskolarako keinuz

noragabe hor dua.

Etxerakoan amak:

—hura akordua!—

«Hau al da eskolatik

itzultzeko ordua?».

 

— Ederminak gazterik

bigunki ukitu

hire faltazko gauak

ezin dira argitu.

— Kantari erromes naiz

ez, ama, larritu!

zorionak baditu

mila zirrikitu...

— Bitarte luze hortan

ni naiz zaharkitu!!!