GOIZ GIRO

 

Egun berria jeikiz

txoriak jostari

egunsentia baita

poztasun atari;

Iguzki, leihoz-leiho

dizdiz mandatari

«egun onak» emanez

irriz zirikari.

 

Bizia arrausika

baldarño pausotan

nagiak ateratzen

lainoen lausotan;

gauez zetzan emeki

loaren besotan,

orain murgildu behar

gaurko arazotan.

 

Sorgimitxi dantzari

aideko bidazti,

tximeleta txanbelin

kolorezko azti

altxor bila loretan

hegaketa aski,

pinpilinpauxa lirain

libreko hegazti.

 

Libreko hegaztitxo

dantzan loraz-lora;

neskatxo pinpiriñak

hain airoski nora?

Higikun errimatu

haur ttikien moda.

Ai goiz-giro jolasti,

beti balitz hola...!!!

 

Harrobitik datorren

hots lakar sutsua,

lantegiko sirenak

intziri faltsua.

Goizak betiko traza

betiko kutsua

atzoko taxu bera

biharko pultsua.