KOPLA GAZIAK / ITSASOAN HAZIAK

 

Itsaso zabal miresgarria

lehorraren haizpa urdin

zeurez aldakor gorabeheratsu

beti eder eta gordin.

 

    — Eguna erdi-sortuan

    arrantzalea portuan

    berjaiotzaren testigu jator

    kresaletako mortuan.

 

    — Belainoaren mataza

    aho mingotsen arnasa

    eguzki gazte maiteminetan

    jaikiko ote den traza.

 

    — Kaioa goitik amildu

    barne urtsuan murgildu

    igeri-loan den lantegira

    arrantzalea hurbildu.

 

    — Olatu-lepo guria

    atzean zilar txuria

    urruntasunak irentsiko du

    puntu beltzezko iduria.

 

    — Arranoa hegaz dabil

    ehize-ametsak darabil

    kalagizona ur handitako

    arazoetan da abil.

 

    — Haize zakarren txistua

    ur-brastaden arriskua

    etxera-gogoz, etsaien aurka

    hor arrantzale prestua.

 

    — Goiko txorien gogoa

    beren kabiko txokoa

    etxeminetan arrantzaleak

    onetsi du itsas-jokoa.

 

    — Belea bere atxera

    zulo latzaren ertzera

    pozez kulunka untzia eta

    untzi-gizonak etxera.

 

    — Tolestu hor erremuak

    bildu sare ta hamuak!

    irriparrexka hartzen zaituzte

    kortzel gaineko mamuak.

 

    — Itsasoa nahiz lehorra

    menderatzeko gogorra

    ur eta lurrak eman elkarri

    besarkada maitekorra.

 

Itsaso zabal miresgarria

lehorraren haizpa urdin

zeurez aldakor gorabeheratsu

beti eder eta gordin.