GABON GAUEKO SENTIPENAK

 

Jai iheskorra ene baitan

irudi-dantza mozkor,

Gabon gaueko sentipenek

jarri naute ameskor.

 

Ilunaren itzal goxoan

taupadaka otoitza.

Gaua! Ixilpean elurra,

jaiotzaren oroitza.

 

Etxeko aterpea babes,

zirrarazko gaupasa

hango bakezko sintonia

barne-jaiaren traza.

 

Barnea! mundu aberatsa,

misterioz betea

ñabardurazko hari mehe

arimaren jittea.

 

Sentimenduen egoitza

maitasun-txoko eme,

irri goxoaren sorleku

liluraren bilgune.

 

Gau beltzean elur xuria

hor ari eta ari,

pozezko haurgintza minetan

min gozoz nago igari.

 

Ixi! Ez hitzetan ixuri

barnetikako ikara!

Gabon gaua! min goxo baten

kilikili-zirrara.

 

Jai iheskorra ene baitan

irudi-dantza mozkor,

Gabon gaueko sentipenek

jarri naute ameskor.