ZAPOLA-REN ITZALPEAN

 

Oihan gizenez itxia

Erdi Aroko pitxia

pinu-betoskoa diote

goi-zelataritzat jarri

Markina zahar eta berri

esku emanik elkarri.

 

Urregarai erraldoia

aurrean Zapola-goia.

Mamu antza du Elkor-gainak

basajaunen egoitza

Arretxinagako haitzak

omen dira haien oroitza.

 

Abesua-ko zelaia

herriko bihotz alaia;

berriketari hitz-jario

lilurazko biltzar-toki,

herri-akelar iduri,

kalearteko antzoki.

 

Goiko Portaleko plaza

aintzinateko arnasa;

Karmengo kanpai-hots ozenez

ihesi joan laminak,

iturrian erradekin

jo zituen maiteminak.

 

Pelotarien aupadak

euskal bihotzen taupadak;

jentil-baratzean sortua

ehizeko joko berotan;

trumoien hotsa ortzean

norgehiagoka pelotan.

 

Azokan jantzi panpoxak

ihauteriko kokoxak;

ahots zoliz hitzezko deman

haien hitzezko ekinak!

kolore dantza eroak

ortzadar-keinuz eginak.

 

Garai zaharren atarian

historiaren harian

itsas aldetik Ziortza-ra

aldapan gorako ilerak,

fede-bultzadaz erromes

erlijiozko bilerak.

 

Mendi-barnean Bolibar

lehenean galdu den ibar;

honen lurreko zuhaitz fina

Amerikan zen landatu,

haren adarretan zuen

askatasunak kantatu.

 

Harrizko etxe jeikiak

jentil-besoz ereikiak;

haitz-hezurduraz moldatuak

denboraren testigu gor,

arbasoen oinetxeek

oraindik diraute gogor.

 

Herri-kultura hor dago

kondaira bizi oparo,

harri bizian ezarria

lehenik hona irazia,

oraingo ekintza baita

historiaren hazia.