GELAN

 

Gela barnean nago ametsez

neure gelatxo txiki txokoan

horma sendodun kabi bitxian

gaztelu honen amets-kolkoan

buru-laneko saio hertsian.

 

Leiho meharrak kanpoko mugan

laukiak mutu horman zintzilik,

ate itxia bake-jagole

ene lagunak beti ixilik,

irudimena musika-jole.

 

Irudimena musika-jole

bere gisako erromerian

eten gabeko jario bero

margo-dantzaren ihauterian;

sargori horrek jarri nau ero...

 

Toki barnekoi, kabitxo maite,

eguneroko testigu kutun,

bakar-laneko bazter eratsu

batzutan alai bestetan itun,

beti niretzat lagun txeratsu.

 

Bakardadeko lantegi goxo,

hortxe naukazu poza xurgatzen;

hor egiten dut lana, hor amets;

malkoak ere hortxe txukatzen...

Zure berotan badut nik babes,

gelatxo txiki, horma xaharduna,

zure itzalpean aurrera doa

eguneroko ene jarduna.

 

Itsas kolkoan bakezko uharte,

basamorduan iturbegia!

hori zatzaizkit neke ordutan

pausaleku on den jauregia.

Egunez eta gau-desordutan

hor daukat gogo ameslaria...

Zure aurrean agortuz doa

polliki ene bizi-haria.

 

Gela barnean nago ametsez

neure gelatxo txiki txokoan,

horma sendodun kabi bitxian

gaztelu honen amets kolkoan

buru-laneko saio hertsian.