BIZIAREN TAUPADAK

 

Mintegiko landare

guri eta xume

baratzaren berritze

joriaren gune,

gerorantz luzatzen den

biziaren ume,

lurraren goiz orduko

jaikiera eme.

 

    Masail gorritto

    egunsentiaren lore

    geure eskutan,

    moldakor, plastilin-ore.

 

Katakume bihurri

piztitxo jolasti;

jauzi eta itzulika

higikune aski.

Arratseko orduetan

begiak ilenti,

erpazorroz gordea

du bere babeski.

 

    Masail gorritto

    egunsentiaren lore

    geure eskutan,

    moldakor, plastilin-ore

 

Pazkoa, udaberri

artaldeen xuri

belardi orlegitan

bildostxoa urduri;

pollitaren munduko

sorgindura-iduri,

berdetan xuria den

ikuspegi guri.

 

    Masail gorritto

    egunsentiaren lore

    geure eskutan,

    moldakor, plastilin-ore

 

Ikuilu lurruntsuan

txaltxoa da jaio

menturazko jauzia

askatasun-saio;

giro berri epela

hain arrotz ez zaio

orkatilen gain zutik

tinkatu da iaio.

 

    Masail gorritto

    egunsentiaren lore

    geure eskutan,

    moldakor, plastilin-ore.

 

Gain habean jarria

txori-familia;

han du betiko ferra

han du ataria.

Tximista hautsiz txik-txak

eltxo-ihiztaria...

Dena aho dena algara

enara kabia.

 

    Masail gorritto

    egunsentiaren lore

    geure eskutan,

    moldakor, plastilin-ore.

 

Haizeak zaztadaka

xistu-akordea

harkaitz-hezurduraren

zilo kolorgea...

Saiak malkor lakarra

maite du, ordea;

bertan du xitaldea

haxpean gordea.

 

    Masail gorritto

    egunsentiaren lore

    geure eskutan,

    moldakor, plastilin-ore.

 

Jori izan ohi dira

onddoak basoan

orbelez ehortzirik

itzalpe goxoan...

Gaurko etxe txokoak

krisi erosoan:

haurrak murriztu dira

makinen auzoan.

 

    Masail gorritto

    egunsentiaren lore

    geure eskutan,

    moldakor, plastilin-ore.

 

Zinta garbi bat martxan

orori abegi,

giza-zirriborroa

bihotz eta begi.

Ukitu gabe zuri

barneko biltegi

testigu xalo baten

pantaila-aurpegi.

 

    Masail gorritto

    egunsentiaren lore

    geure eskutan,

    moldakor, plastilin-ore.

 

Haur ttikitxo xume bat

muker garraxika

iturri mikatz horren

kideko musika...!

Drama bat ote, ala

haurraren lirika?

besterik ez daki ta,

negar intzirika.

 

    Masail gorritto

    egunsentiaren lore

    geure eskutan,

    moldakor, plastilin-ore.