S. JUDA APOST.
GUTHUNA KATHOLIKOA

I. KAP.

        1 Juda, Jesukristoren zerbitzariak eta Jakoberen anaiak, Jainko Aitak santifikatu eta Jesukristok konserbatu eta deithu izan dituenei, 2 miserikordia, bakea eta karitatea gaindiz dathorzkitzuela.

        3 Ene maiteak, lehia handirekien gogo bainuen zuei eskribatzeko erkide dugun salbamenduaren gaiñean, mengoan aurkhitzen naiz orai egiteko, errekeritzen zaituztedalarik, arren guduka zaitezten gogotik behin sainduei eman izan zaien fedea gatik. 4 Sarthu izan dire ezen gure arterat gizon batzu, aspaldidanik Eskrituretan seiñalatuak direnak kondenatuak izateko; Jainkoaren beldur gabeak, gure Jainkoaren grazia ganbiatzen dutenak lohikerian bizitzeko estakuru batetarat, eta Jesukristo gure nausi bakharra eta gure Jauna ukhatzen dutenak.

        5 Orhoitarazi nahi zaituztet bada, baidakizkitzue berdin gauza guziak: Jesusek populua athera zuenean eta salbatu Ejiptotik, ondoan sinhetsi ez zutenak suntsiarazi zituela. 6 Bere lehentasuna begiratu ez zuten aingeruak berriz, aitzitik bere egoitza propiala utzi izan zutenak, egun handiko jujeamendukotzat erresalbatuak daduzkala, ilhunbepean gathe eternalez estekaturik; 7 hala nola Sodoma eta Gomorra eta hekien hauzoko hiriak, hek bezala lohikeriari abandonatu zitzaizkoenak eta bertzelako haragi baten ondoan abiatu ere zirenak, egin izan baidire su eternalaren exenplu bat jasan izan duten gastigez. 8 Manera berean dute hauk ere bere haragia hidoiztatzen, autoritate beharkitua mezprezatzen eta kargu handitan direnez gaizki erasten.

        9 Mikael arkanjelua deabruarekien zihardukanean Moiseren gorphutzaren gainetik, ez zen ausartatu madarizionezko sententzia bat ematerat haren kontra; xoilki hark erran zuena zen: «Jaunak erabill dezala hire gaiñean bere botherea». 10 Hauk ordean aditzen ez dituzten gauza guziak behindik behin kondenatzen dituzte blasfemiorekien; naturalki bestia mutuek bezala ezagutzen dituzten gauza guziez berriz baliatzen dire bere buruen gaizkoatzeko. 11 Zorigaitz hekientzat, zeren Kainen bidean abiatu baidire, sariaren egarriz Balaam bezala enganatuak izanik; abandonatzen baitzaizko deserregelamenduari eta Koreren alboratamendua segituz galduko baidire hura bezala.

        12 Jende batzu dire bere othruntzetan likhitsak, jaunkorrean dauntzanak deusen beldur gabe, bere buruen bazkatzeaz baizen artharik ez dutenak. Hedoi batzu dire urik gabekoak, haizeek harat hunat darabiltzatenak. Arbola batzu, ihartzean baizen loratzen ez direnak, fruiturik ekhartzen ez dutenak, bietan hillak, erroetarik atheratuak. 13 Itsasoko uhin dorphe batzu dire, konfusionezko arrapoa etxatzen dutenak. Izar errebelatu batzu, tenpesta ilhunbetsu bati iguriki behar zaizkonak eternitate guzikotz. 14 Horietaz profetisatu ere du bada Enox Adamen ondoko zazpi garren izan denak, erraten duelarik: «Huna non dathorren jauna milliunea dituen sainduekien, 15 guzien kontra jujeamendua ematerat, eta bentzutzerat gaixtagin guziak, egin izan dituzten gaixtakeria guziez, eta bekhatoros gaixtoek Jainkoaren kontra erasi dituzten ahakar guziez». 16 Murmuratzaille batzu dire bethi errenkuraz daudezenak, bere nahikaren arauera dabiltzanak, orgulleriazko hitzik baizen ahoan ez dutenak, bere intresa gatik presunen admiratzaille jartzen direnak.

        17 Zuek ordean, ene maiteak, orhoit zaitezte Jesukristo gure Jaunaren Apostoluek aitziñetik erran izan darozkitzueten gauzez, 18 zeiñek erraten baitzarotzuen azken denboretan ethorriko direla enganatzaille batzu bere gutizien arauera ibilliko direnak gaixtakerietan. 19 Jende batzu dire, berak aldaratzen direnak, gizon abrekarako batzu, Jainkoaren Izpiritua ez dutenak.

        20 Zuek ordean, ene maiteak, zeben buruak altxatzen ditutzuelarik edifizio izpiritual bat bezala zuen fede guziz sainduaren zimenduaren gaiñean, eta Izpiritu Sainduaz othoitz egiten duzuelarik, 21 zaudezte Jainkoaren amudioan, Jesukristo gure Jaunaren miserikordiaren begira bizitze eternalekotzat. 22 Errepreni zatzitzue behintzat ja berenez kondenatuak diren batzu. 23 Bertzeak berriz salba zatzitzue sutik bezala atheratzen ditutzuelarik; bertze batzu berriz ditutzuen urrikari, zebonentzat ere beldurtzen zaretela, eta duzuen higin arropa lizundu bat bezala haragiaren khutsua duen guzia.

        24 Botheretsu denari, bada, zuek begiratzeko bekhaturik gabe eta eramateko haren gloriaren thronuaren aitziñerat, xahu eta tatxa gabe, bozkarioz gaindi eginak, Jesukristo gure Jaunaren ethorgunean, 25 Jainko bakhar gure Salbatzaille denari Jesukristo gure Jaunaz, gloria eta magnifizentzia, nausitasuna eta botherea mende guzien aitzinetik eta ori ere eta bai mendetako mende guzietan. Amen.