frantzisko jabier kintana

 

      Bilbaon jaio zan 1946-ko urriaren 13-an. Batxillerra bukatu zuen eta Zientziak, librean, estudiatzen ari da. Euskaltzaindiaren laguntzailea da. Jakin, Zeruko Argia eta beste zenbait aldizkaritan idazten du. J. Oñatibia-ren Método de Euskera radiofónico bizkaieraz jarri zuen. “Unamuno” izeneko ipui saria eraman zuen 1968-an. Bi nobelaren egilea da: Beste izakia, Bilbao, 1969; eta Noizbait nunbait, argitara gabea. Eta antzerki bat, argitara gabea.

 

Gaztetan ames urdin

ideial bat neukan

osorik zoragarri.

 

Burua nagusitu

egin jatan

ta amesak

ames dira

guzurrak lakoak.

 

Zeri oratu?

Nori eutsi?

Zergaitik hemen bizi?

norako eginak garan

ezelan ezpadakit?

 

Loak hartu ezinik

aspaldi nengoan

bueltaka izaren arte

bakerik euki baga.

 

Nun argia topatu?

Nogan dirdira ikusi?

Zerua mutu egoan

niretzako etzan hitzik.

 

Eneban ezer siñesten

maitetasuna ezik

Eleiza...? abadeak...?

Jaun...goikoa...?

Nagusien milla ipuin!!!

 

Halako batean

Herria

nigarrez

aurkitu neban,

 

nire anaien mingarri.

 

Harrezkeroztik banabil

ezpata hartuta hortik

eten-gabe,

burruka ixillez.

 

 

LIZARDI

 

Lizardi, otoi Lizardi!

nunbait haudan hori

nire olerkari hori

Udaberriko neskatxa

ihes egina ote zait?

Lizardi, herriko semea

udaberrikoa

mendien maitea

hizkuntzaren senarra

Lizardi... betikoa.

Hire oihartzunak

oraindik dantzudaz

“Maite ditut gailurrak

argiak ez beste

Oii egaztia banintz

gaiñik gain nenbilke”

Mendiak, itsaso urdin

pago ta hareitz

bakardadea...

Maiteak ihesi

ezta eguzkirik

ez eta argi berorik.

 

        * * *

 

      Zergaitik?

Zergaitik, bai, zergatik

berriro galdetzen dut nik

zergatik eguna

zait beltzitu neri?

Zergatik, bai, zergatik

jakin nahi nuke nik

Zergatik hotzez nago

berotzeko arropa barik?

Zergatik, bai, zergatik

susmatu arren,... nik

zergatik esperantza

enuen galdu guztiz?

Zergatik, bai, zergatik

eztut humetako nigarrik

Zergatik nik gauean

eztakusat izarrik?

Zergatik, bai, zergatik

ezta trumoirik etorri

Zergatik nauzu galduta

zer egin jakin eziñik?