paulo iztueta

 

      Berastegin (Gipuzkoa) sortua, 1941-eko martxoaren 22-an. Aita Sakramentinoa. Bere ikastaroak Madrilen eta Erroman gehitu zituen. Aldizkari askotan eman ditu bere lanak, eta poemak, batez ere, Olerti eta Egan-en. Poesi liburu bat du argitara gabea, eta bertatik Mailuarekin deritzan poemetarik hartu ditugu egunkari eran eginikako zati hauek.

 

 

HITZOK

       Egunak 25

 

Ez ta ez! Ez noakizu aurrerago!

Zaplaztekoa erantsi didate;

bortizki mexatu bainaute

ixildu nadin derrepente...

Profeta bat omen nirudien,

ta etorkizunak deus enekin.

Oraingo ipur-zurikeriaz niarduen

eta hortzak erakutsi zizkidaten!

Farsanteak marruka ari dirade,

gezurra dariotela oro debalde,

ziraunaren ahotik agortutzeke.

 

 

ATZO

       Egunak 28

 

Nahiago nuke atzera bi pauso egin.

Igaroaren jarrai itxaropenak

narama aintzinako jatortasunera;

hor baitago “Hutsaren” hazia,

han nitasunaren jaiotherria,

han lurpera behar ditut nik

soineko ezurrak eta hautsak,

jaso nazan sorburu-osiñak,

betikotasunaren hilobiak!

Hurrutiago abendats,

hurrutiago ene aztarna,

harexeago esistentzi bat;

eta sakonaren magalea

inguratuz “Gu”, “Denok”,

“Hutsa”, Jorge Oteiza.

 

Lurrean etzanda

entzunez nago

orduko sinfonia...

gaurko habarrotsa...

...eta etzaida sartzen ohiartzuna

belarrira; bai lur-zolaren dardara.

 

 

BIHAR

       Egunak 29

 

Aitaren kutxa emanen zaio behartsuari,

Jaunaren barkapena pekatari otsanari.

Egizaleak izanen du Erreinua;

gezurtiak ba-duke inpernua.

Noan, gezur-mamurik gabe, gizonen eiztari;

hoiengan arkitu bainezake Goikoaren argi.

 

 

ORAIN

       Egunak 30

 

Noiz arte nagoke deika?

Noiz arte entzun-bera?

Nire etxean itzali zen bakea;

arrezkero ezta sortu eguzkia.