jose mª agirre

 

      Ataunen (Gipuzkoa) jaioa, 1943-ko ekainaren 29-an. Ekonomia estudiatzen, lehen Suizan eta orain Beljikan ari da, Zeruko Argia eta Jakin-en argitarazi ditu zenbait lan. Sartre-ren La P... respectueuse eta Camus-en L’Etranger euskeratuak ditu, argitaratzeke.

 

 

EGIA GARESTI DALA

 

Heldu zen udaberria

kantuz hasi henaria.

Lagunak preso jauzi direla

iritxi zait gaur berria.

 

Urtu ziraden elurrak

Narrotu otso-zakurrak

Oraino ere minberaz daude

ene lagunen hezurrak.

 

Lanuak dire odoldu

gizon prestuak ixildu

Behin berriro gure Sisifo

maldaz behera amildu.

 

Kontzientziak urratu

“Bakea” dute saltu

Lau orma artean egin dituzte

bizirikan enterratu.

 

Indarra dela morala

ordena dela kabala

agertu dute gizonarentzat

egia garesti dala.

 

 

ERNESTO

 

Galtzairu oker ezina

Kondairaren erdi-mina

Gerlaz suntsitu beharra dela

leheno gerlaz egina.

 

Ezker nagia Europan

aberatsa ametsetan

Hiretzat erruz laudorioak

Parisko snak-barretan.

 

Izarrak oro itzali

Vietnam dena kiskali

egia faltsiz ohi bezala

begiak zaizkit estali.

 

Uso billa kabiroia

basoan kexu leoia

Bizi direnak jantziko ditek

hildakoaren koroia.

 

Harri arotik burnikora

injustizia beti gora

Ez duk zillegi zapuztutzea

haundi maundien loa.

 

Posible dadin ezina

gizonaren larrimina

nundikakoa ote diagu

paradisu baten grina.

 

Hezur haragi lurrean

Txe heriotzan atzean

Testamendua banatu ditek

kide-etsaiak zotzean.