mañex pagola

 

Baxe-Nabarreko Landibarren sortua, 1941-eko ekainaren 28-an. Euskal idazle eta kantari zolia dugu. Apezgo estudioak egin zituen 27 urtera artio. Herria, Enbata, Gure Herria eta beste zenbait adizkaritan emanak ditu bere lanak.

 

 

EZPAIN XOKOAN

 

                   I

Ezpain xokoan primaderaren irria

Zainetan aldiz Aiten izerdi garbia

Hola dabila egunez egun gaztia

Indar gaitzean nahiz maitatu bizia.

 

                   II

Eskual-gazteak irrintzina du botatzen

Bazterrak oro dituelarik harrotzen;

Oihu samin hau nork ez du hemen entzunen

Eskual anaiak laster elgarri jos gaiten.

 

                   III

Gure gogoek behar lukete zabaldu

Bihotzek aldiz barne aldetik berritu!

Eskual-Herriak beharko baitu azkartu

Etsaien pera erori nahi ez badu.

 

                   IV

Dezagun egin gure biharko Herria

Laster berrituz gure ait'amen lur bera

Orduan zinez baita jautsiko gutara

Goizik amestu dugun zorion ederra.

 

                   V

Gazten artean bego irria nagusi

Herrabideri beti eginez ihesi

Batasunean traba behar da aurtiki

bide berari nahi bagira jarraiki.

 

 

ITSASO ONDOAN

 

Itsaso ondoan uhainer musuka

ta mendi gainetan zerurat otoizka.

Hor Eskual-Herria ari da galdeka

Eskualdun guziek dezagun besarka.

Maite duten semeak dezatela tinka

lehengoen hitza berriz hartan finka

oi! eskualdun seme ez maita erdizka

bainan gora kanta gure errepika.

 

           Idek ditzagun begiak

           zabal bihotz hertsiak

           eta ikus zoin amultsua

           dagon Eskual-Herria.

 

Eskualdun semeak eskuara badaki

erdarean ere trebe ta polliki

gizon jakintsuna hor bada ageri

horra eskualduna nausi kaskoinari!

Etorriko dea bazkoi berrikari

bere gaintasuna Eskual-Herriari?

Oi entzule maite, ihardetsak huni

bihar’e eskualdun nahi haiza bizi!