gexan alfaro

 

      Urepelen (Baxe-Nabarre) sortua, 1941-eko uztailaren 21-ean. Euskal letretan ezagunagoa da Gexan Lantziri eta Xemartin izenez. Herria, Zeruko Argia, Gure Herria, Enbata eta beste zenbait aldizkaritan argitaratuak ditu bere lanak. Goiztiri-ren bulego lanetan aritzen da.

 

 

HERIOA!

 

Nunbait hurrun

tiropean hiltzea

edo oto baten barnean

bizia galtzea,...

Mendiko arrokatik eroiztea

edo etxean mundu hau uztea,

toki guzietan dago heriotzea!...

 

Herioaren indarra

ezin ukatuzkoa...

Egun guziz mundu huntarik

jendea trumilka

ez ote daramakigu lurpera?

Sendimendu gabeko herioak

guzieri berdin du emaiten: ziloa!.

 

 

BAKE OIHU!

 

            Oihu eginen dut bai oihu

            nun nahi eta noiz nahi

            egiazko bakearen alde!

 

                 I

Indarrez eta zuzen kontra jarri

bakarrik nik ez dut nahi

zuzentasunik gabe.

Egun bakea dugu galgarri

Injustizi guzien gain estalgi!

 

                 II

Zertako eta zertaz oihu egin

guziek adi dezagun

zuzentasunik gabe

ezin dezakegula herrian

egiazko bakerik zutik eman!

 

                 III

Herrien eta gizalde guzien

arteko bakebidea

zuzentasunez eta

libertadez da moldatua

maitasunez delarik azkartua!

 

 

MENDI MENDI!...

 

            Mendi mendi mendietako

            bakea libertatea

            artzainaren ontasuna

            zorion maitasuna!

 

            I

Artizarra gora zeruan,

goiz argi urratzean,

jadanik artzaina mendian

makila eskuan,

zuriko aldean,

artaldea derama, alan, alan!...

 

            II

Artaldeak dio artzainari

emaiten lan ugari!...

Bainan osasuna dario,

mendiko gizonari,...

xoriak kantari,

mendi, oihan, zelaiak ikusgarri!

 

            III

Mendian gora dauka ber’etxola,

estalgitzat du tola,

arrasuak xuri-xuriak

goizeko iguzkian,

laster du irria,

mendiko artzainaren jauregiak!