gabriel aresti

 

      Bilbaon jaioa, 1933-ko urriaren 14-an. Komertzio karreraduna. Poeta eta teatrugilea. Beste zenbait lanen artean, bost teatruren egilea, eta bere poema liburuak dira: Maldan behera, Bilbao, 1960; Harri eta Herri, Zarautz, 1964; Mailu batekin (zatiak), Donostia, 1964; eta Euskal Harria, Bilbao, 1967. Eraman dituen poema sariak: “Loramendi”, 1959; “Orixe”, 1963; “Lizardi”, 1966. Harri eta Herri-kin sortu zuen bere era berezidun poesia soziala, nortasuna emango ziona, eta 1968-an “Iparragirre” izeneko saria jaso zuen lan honegaitik. Gazteen artean bere jarraitzaileak ditu. Zenbait poema “Ez dok amairu”-koak kantatzen dituzte.

 

 

L):

 

Munduan

gauza bat bakarra dago

erosten eztena:

Dirua.

 

 

S):

 

Irrintzi gorri batekin

estaldu nituen

egunaren eta gauaren

ate meharrak.

Sega zorrotz batekin

ebaki nituen

debekazaleen

aginak.

Gero hil

nintzen.

 

V):

 

Esanen dute

hau

poesia

eztela,

baina nik

esanen diet

poesia

mailu bat

dela.

 

 

W):

 

Egia bat esateagatik,

alabak

hil behar bazaizkit,

andrea

bortxatu behar badidate,

etxea

lurrarekin

bardindu behar bazait;

Egia bat esateagatik,

ebaki behar badidate

nik eskribitzen

dudan

eskua,

nik kantatzen

dudan

mihina;

Egia bat esateagatik,

nire izena

kenduko badute

euskal literaturaren

urrezko

orrietatik,

inoiz,

inola,

inun

ez naiz

isilduko.

 

 

X):

 

Egun batean

eztu inork

ezer erosiko;

egun batean

ezta merkatuetan

sagarrik

salduko.

Egun batean

guztiok

izanen gara

zoriontsuak.

 

 

C):

 

Siboneitik Kubanakanera

goajiro honek

egunero janen dut

nire arroz-aranke pizka,

egunero moldatuko dut

nire trokela,

egunero ikasiko dut

nire aleman

edo turko

lezioa,

egunero hartuko dut

nire katixima.

Egunero sentituko naiz

prestua.

Eta posible da

noizean behin

Ninarekin

ohean sartzeko

burges

pekatua

kometi dezadala...

 

 

K):

 

Nik ere

badut

nire egia,

eta bankero jaunarenak

bezainbat

edo gehiago

balio du.

 

 

N):

 

Egun batean

munduak akabatuko dira.

Bai.

Badakit.

Eta zeruko Jaunak

Josafateko zelaian

guztiok

juzgatuko gaitu.

Orduan,

azkenak

izanen dira

lehenak,

eta haren eskuman

jarriko dira

ezkerrekoak.