GERRATE ONDORENA

 

Altsasua, gerrate ondorengo ixil-unea.

Pagadietan atxeman diat gotorkeria.

Bihotzean hildura. Bidekurutzetan

ikusi dizkiat gizonak bakanduak,

 

          mutu geldiak,

          estrapuzko kapusaiaz buruak eztaliak,

          mendiari buruz atarrapazka gora zoazila

          pausaldirik gabe, oi arraza galdua,

          madarikatua.

 

          No-man's-land bihurtua zakuskagu

          oi enea zinen lurraldea. Ze ausardia,

          ze argibide egarria, milaka urtetan

          etenik egoen mintzaira hirekin lokarritzea.

 

Hemen herri batek bere buruarekiko oroitzapena galdu bide du, lurra kixkaldu da, gizona mututu, adimen izpia iraungi, ziurki. Hemen euria ateri gabe ari da joandaneko mendeetan. Bisutsak txorabiatzen ez duan lur-barruko hilerriaren ixiltasun pixua dario. Hemen formaren arrastorik ez dut ikusten. Dena zaigu xahutu, herrausi, ezeztu. deshistoriaren erreinua da gure hau.