GOIZEGI, DAMA GALANTA, GOIZEGI

 

               Goiztiar zabiltza

               Dama galanta

               Goizegi azaldu zara

               goizegi zuriz

              goizegi ululari

     Goizegi, Dama galanta, goizegi!

 

Bazara hemen azpigona zuriz jantzita

eta zatoz arnasotsa izoztuta uluka

 

bazatoz eta bazara hemen

ezustean harrapatu nauzu

 

eta zure hats jelatsuan

bildu didazu bihotza.

 

               Goiztiar zabiltza

               Dama galanta

               Goizegi azaldu zara

               goizegi zuriz

               goizegi ululari

     Goizegi, Dama galanta, goizegi!

 

Adats zirimolan dakarzu leihaize ziztukaria

eskuetan aizkoren dantza zizt-zazt

 

zirrara eroenean intziriak

aditzen ditut zeurean

 

sinfonia makabroa bailitzan

eta gero ezerezarik itzulezinena.

               Goiztiar zabiltza

               Dama galanta

               Goizegi azaldu zara

               goizegi zuriz

               goizegi ululari

     Goizegi, Dama galanta, goizegi!