SANGUIS MARTYRUM

                Europar sinhesmengandik bizia eman duten

                Euskaldun sorgiin,

                azti eta belhagileen orhoiztzapenetan.

                        Jon Mirande

Ene herri on bakezalea,

eliza zuriz bethea,

Goizerritiko Jaungoikoaren

herri hautetsi maitea.

Hire zerua garbi duk, kheak

Hegoak ditik ohildu;

ohiarzun gabe hire orhoitzan

auhenak dituk ixildu...

Zuen auhenak, ene arreba

plazetan erhauts eginak,

gizon beltz heiek erre zaituzten

Euskalerriko sorginak!

Sekula zuen martyrioa

ez da khantatu euskaraz.

Niketz orhoit naiz: dietzadala

bertso berriak sortaraz.

Zinez alpherrik hil zaretea?

Galdu zarete orozbat?

Ezin da... ezen zuen odola

date pagano-hazi bat.

Zuen odolaz erein 'tutzue

Europako laur hegalak,

zuhaniek eta zuen ahizpek,

oi! aphez-eme aphalak.

Belhaunik belhaun zueri esker

da begiratu azkarra

geure lainuak asmaturiko

theologia zaharra.

Zuen arima Gazte-Lurrean

kontsolaturik daudenei,

arartekotzat harturik eta,

egiten diet egun dei.

Zuen bitartez hunki ailitza

zorioneko egoitzak

Ortzi-Thor edo Akher Beltzari

nik dagiodan othoitzak:

Zu, eta beste jainkoak ere

hor zineten aspaldi,

gure arrazak adoratuak

gizaldirikan gizaldi,

Mari munduko, basajaun-jainko

okher jakitun osoa,

jainkosa zaintzen zenituztenak

ibaia eta basoa,

hil ez zaituzte gizon-beltz hauiek,

lotan zaudete bakharrik;

gure bihotzak adi 'tzazue,

jaiki zaitezte, atzarrik!

Baal arrotza ukhatzen dugu,

zuentzat berriz sagara

eginen dugu aldareetan

zathozte, arren! zain gara.