KAMA-GOLI

                (Motzaileen hizkuntzan)

Hiretzat goli kherautzen dinat

erromeetako gazin mendroa

ene muirako mandro londoa

mol loloena ene khertsiman.

Hire dui ankhai baro, kaloek

pekhautzen nine kamatze-jakaz

phiria hautsiz erromenitzat

letu hindudan latziaz geroz.

Zoan mitxaia panintinora,

pindro dantzariz texalitzen zan,

haize khilaloz txokiak upre...

—ni hari kuti, dibilotua.

Zethorren txaia pindro dantzariz

panin parnoa paninekoan

dekhatu nuen dibezi hartan:

dekhatu-eta kamatu nuen.

Kherean txiautu nintzan harekin,

erantzi nauzkon haren trin sokak,

erantzu naukon gata parnoa

txaribelerat eramaitean.

Txaribelean zuautu duiok

zuatzekorik gabe latzian,

latzi guztion dutik gabean...

...phekautu nintzan kamatze-jakaz

Heure kamatzez phekautzen niagon,

kalo-kastako neure mindroa,

ene mol lolo eta mandroa,

ene latzien duta haizen hi!