ITZAL UXAKA

Ene harpeko estalaktita bustietan

barrena itzuri ohi,

irristakor,

inoren karburo-argia sumatu orduko.

Kare-uraren etengabeko tanta-jariatzeak hazi

estalagmitak nekez estal dezake bere hots pausatuak —tak! tak! tak!—

milaka urtetan zaindu duen misterioa.

Lei-karraldoak harkaitzetan tarteka egin zirrikituetatik barneratzen diren

eki-siskil mehe bakanak ez dira

aski indartsu haren soslai zaharkituaren argazkia hormetan izozteko.

Hauteman ezinezko mugimendu telurikoak harkaitzen arteko hezur hautsiaren

durunda —kroosk!— eragitean,

harrikatzez marraztutako zaldi-bisonteen gainetik

eta hauts gorriz finkaturiko ahur heteroformen azaletik

labainduz

ezkutatzen da,

itzalen beldur bailitzan.