Uretan idatziak
Patxi Salaberri

Kutxa, 2002

 

 

EZ HARRI ETA EZ HERRI

 

Ez harri eta ez herri, Gabriel,

dagoeneko euskal munduak ez du ezer zahar ez du

ezer berri, salbu eta lukurarien hamaika interes zerri.

 

Sarri.

ez beti neurri,

bada, gurean

makina bat hitz larri,

amets zelaiaren ongarri,

ezpainetara bezain sarri

lokamuts ilgarri

bilakatzen direnetakoak bakarrik.

 

EUSKAL HERRI! ABERRI! ATZARRI!...

zenbat eta zenbat ustezko lokarri,

hitz ustel, huts, apaingarri!

 

Ez euskal eta ez herri,

Gabriel,

baina, gainerakoan, bai, denetik larregi!

 

Itxaropena baino ez,

Gabriel,

itxaropenaren egarri!

Eta, betiere, bihotz-minaren dei...

gogoangarri?

okaztagarri?

 

Uretan idatziak
Patxi Salaberri

Kutxa, 2002