AITORRA

Poeta natorkizu

—handikeria ote?—,

ene gogoan bahetutako hitz xumeak larrazkeneko lore-sorta gisa eskaintzen.

Poeta etorri ohi natzaizu

olerki bat burututako guztietan,

nahiz izendapen hutsal horretatik —badakizu— herraz aldendu izan naizen betiere.

Baina inoiz aitortuko ez dizudan arren,

poeta nauzu,

poeta,

paperik eta tintarik gabe,

mutu,

ezer idatzi ez

edota hitzak aliritzira lerrokatzen baditut ere.