SARKORRA DA OSO

Sarkorra da oso

ferekatzen ez den biolinaren soinua

bakartasunean;

inoiz ez, halere,

gorrak desira dezakeen bezainbeste.

Biolin-urratzaileari isuri intziriak

zinkurinago dira

bihotzera iristean.

Kirrinkago eta mingarriago,

nekez estal lezake

kanpoko eguzki distirantak

izarrik gabeko doinua.

Melodia

ebakitakoan

sorturiko

hots hautsi bakoitzak

pentagrama beltzaren

bila hastea luke

xede bakar

Zeren, zizpuruka izan arren,

biolin marketsak

ezin kamus baitezake

musika-argiaz amesten duen

itsuaren ilusioa!