EGURKETARIAREN AHAIREA

Negu gorriaren beldurrak egur-meta agorturantz bideratzen ditu

ene begiak

larrazkenaren atarian.

Aizkoraren deiak oihanera narama

behelainoa hedatze garaian.

Hostoak horbel,

horbela zohikatz,

hartan zut haziriko

zuhaitzaren,

zuhaitz bakoitzaren,

zuhaitz guztien

azal latz bizitza-estalgarriak

airean izozten du ene aizkorakadaren kemena.

Non bilatuko du negu gorriaren mehatxuari diodan zurkaitzak haritza egur egiteko adorea?