Uretan idatziak
Patxi Salaberri

Kutxa, 2002

 

 

BELAR-GOGO

 

Goiztiriko ihintza lurruntzeke duen belardian luze,

ortzi garden urdinera begira,

kamomila lorearen buztantxoa ezpain-ertzean,

landare, gorotz eta airearen usain nahasien artean,

bestelako hotsik gabe,

ardien, behien, zaldien ezkilak soilik

harkaitzezko arragoan!

 

Esaidak Walt, please:

Non da horretara iristeko bidea? Non kemena?

 

Lantoki argi-eroso-ergonomikoa,

paperez, mahaiz, tramankuluz bete-hornitua,

goikoen agindu izoztuak jaso eta behekoei samurkiro betearazteko prestatua,

garrantzi handiko hutsalkeriak erabakitzeko taxutua...

gizonen belarretaratzeko nahiak berbideratzeko moldatua...

 

Ordutegia: 08:00-17:00

                  Goizeko zortzietatik

                  arratsaldeko bostak arte?

 

Egunsentitik ilunabarrera...

Eguzki izpiak alferrik xahutzen bere indarra,

kamomila-lorea landarean zimelduz;

ezkilak, usainak, hotsak...

                  airean sakabanaturik

gogoa baino ez

begitaziozko belar urrunetan!

 

Uretan idatziak
Patxi Salaberri

Kutxa, 2002