Uretan idatziak
Patxi Salaberri

Kutxa, 2002

 

 

FEDE AITORPENA (II): ARCUS AD SEPTEM LUCERNAS

 

Zazpi argimutil, zazpi aingeru, zazpi tronpeta,

Patmoseko mezulari ahituak

Ikusi eta indarge aldarrikatuak.

 

Menorah-ren besoak,

Sakonetako itsasoak, zeruko izarrak,zigiluak...

Ene haritzaren adarrak,

 

Zazpi,

Unibertsoan hirusta gisa landatuak,

Hirua baitu ororen gako, ororen egia,

 

Lauki perfektuaren gainean eraikitako forma betegina.

Zenbaki iniziatikoa, anitza,

Kabalisten ametsa,

 

Berdin Jainkoa,

Izaki hobezina.

Sinistunen itxaropen merkea,

 

Nola Neptunoren fedea,

Errealitatearen izpirituaz hanpaturiko sardea,

Irudimenezko itsas-lurren arteko mugak hausteko zorroztua;

 

Bizitzaren katebegiko arra, emea, kumea,

Existentziaren hondoko legea:

Hura, Bera, Hirua.

 

Uretan idatziak
Patxi Salaberri

Kutxa, 2002