Uretan idatziak
Patxi Salaberri

Kutxa, 2002

 

 

HIRU HORTZEKO ZUTARGIA

 

laz      aurten .....geurtz

Atzo    gaur        bihar

Lehen orain        gero

 

          Oro

          ilaun,

          oro

          une,

      une igaroa,

igarotzeko keinua dagiena barne.

 

          Denbora,

zutunik nekez mantendu ohi ditugun kontzeptuen arteko hutsune,

mintzairaren irudizko habe

          ustel,

    zuhirindua,

bizitzaren irensle,

  amets-errausle,

 

        Denbora,

luzaroan eskuztatu arren,

  Koheleten egileak ere

            ezin

moldeatu izan zuena;

  etengabe isurtzen,

haurren atzamarren artean

unean uneko lipar ñimiñoenaren tantarik ere

      uzten ez duena.

 

        Denbora,

ezerezaren parekoa,

            hutsa,

          betegabea,

gogoratzekoa besterik ez dena,

igaro-min eternalera kondenatua.

 

Uretan idatziak
Patxi Salaberri

Kutxa, 2002