Hamahirugerren jelkaldia

 

(Jelki Santa Kruz, Makatzaga Orioko erretora,
Lizarraga, Nejera jenerala eta lagünak, esküin).

 

         Makatzaga

Aia hartü behar dügü;

Han gotorgüne bat egin.

Hori segürta dezagün

Gerlan barnago joan aitzin.

 

         Lizarraga

Gü ere aitzindariak

Algar hitzartü gütüzü;

Uste dügü behar dela

Itsasbide bat zabaltü.

 

         Santa Kruz

Nik ez dit ontsa ikusten

Jartea güne batetan.

Jada gordagia badügü

Arixulegi bortütan.

 

         Lizarraga

Santa Kruz, gure manüak

Behar dütüzü jarraiki;

Zure lagün gütükezü:

Zük jo zure indarreki.

 

         Santa Kruz

Ez dit aski tirokeirik:

Nola joan güdükala?

Goit genetzake etsaiak

Armaz bagünü ahala.

 

         Najera

Has zure borrokaldia

Eta ekürü egürük;

Behar dütüzünak oro

Igorriko dütügü gük.

 

(Lizarraga, Najera joan).

 

         Santa Kruz

Mutilak, beti bezala,

Goitüko dügü etsaia;

Ez üken arren düdarik,

Arma dükegü nasaia.

 

         Makatzaga

Hona güdari saldo bat:

Hegoaldetik horra dira.

Segür Lizarraga daite,

Jiten gure lagüntzera.

 

(Sar Loma, Moriones, Urdanpilleta jeneralak eta etsaiak, exker).

 

         Moriones

Orai bürüz bürü gütük,

Hona Santa Kruzen aldi;

Egün leher eginen dük

Orokietaz orit hadi.

 

         Santa Kruz

Ez güntüan Orokietan;

Heben güdari haütüak!

Ago! han izan baginen

Galdüko zünütüen güdüak.

 

         Loma

Lizarragak koditü hai;

Oso üngüratürik hiz.

Sarri diagü garaipena

Goraipatüren azaliz.

 

(Sar Maria mezülaria, paseia).

 

         Maria

Ez lagüngoarik egürük;

Lizarragak jo dü Itziar.

Armarik ez zaizü jinen;

Zihaurk ikus zer xede har.

 

(Maria paseia, joan).

 

         Santa Kruz

Ene haurrak, bil indarrak;

Jo ezazüe esküin, exker.

Egizüe ahal bezala,

Bizi elkitzen giren ber.

 

(Egin güdüka, etsai zonbait erho,
lagün bat hil, bi lagün preso, besteak ihesi).

 

         Urdanpilleta

Hau boztario dügüna:

Santa Kruz lehentze goitü!

Bena galtze üken dügü,

Bera ihesi joan zaigü.

 

(Oro joan; lagün hilak eraman; etsai hilak ziloalat).