GABEZIAK

 

 

I

 

Zerbikalak tenkatu zaizkit,

nahigabeak hesteak estutu,

eta Ikeako estorearen gisa

korapilatu eta bildu zait sabela.

Medikuak aholkatu dit

arnasa trankil hartzeko

eta horrela

bizitza orekatuko dela.

 

Baina galdua du bizitzak bere-berea zuen bizitasuna

eta zurekin bizi izandako bizipenak bizi-bizi datozkidanean

iragana bihurtzen zait bizigai bakarra.

Baina bizipenak penetan hartzen ditut

bizipozak poztasunik ez dakarkidan

arnasaldi luze bezain urdurian.

 

 

II

 

Komuneko pisuaren marmar metalikoak

pisua galdu dudala diosta

zu galtzearekin batera

hiruretan hogeita hiru kiloko gorpu(tz) ihar hau

inoiz baino astunagoa nabaritu arren.

 

Ondoko ispiluaren islak

gaztetako dirdira galdu dudala diosta

zu galtzearekin batera

itzalen dirdirak

inoiz baino nabariagoak begiztatu arren.

 

Dutxako uraren lurrinak

gorputzeko beroa galdu dudala diosta

zu galtzearekin batera,

baina odola irakiten nabaritzen dut,

hezurrak astun,

begiak ilun

eta odola bor-bor

arroztutako gorpu(tz) honetan.