OROITZAPEN LIXATUAK

 

Zure arropa zaharretan hondoratu dut aurpegia

eta indarrez bertako usainak neureganatu

nire malko bakartiek kotoizko zelaian

lur hartzen duten bitartean.

Zure gorputzaren forma duten arropak tolestu

eta plastikozko poltsetan sartu ditut

behartsuek beren premia ase dezaten.

Baina badakit

hondoratu zaidan gorputz atal bakarra ez dela aurpegia izan

eta premia larrian eta biluzik dagoena

nire bihotza dela.

Plastikozko poltsa ilunetan

zure arropekin batera

tolestu eta sartu dudan hori.