HERIOREN BIZITOKI

 

Arriskuz beterik omen zegoen mundua:

mendiaren ertza higatuegia,

lainoa itxiegia

eta errepidea bihurriegia.

 

Arriskuz beterik omen zegoen mundua:

atzerria ezezagunegia,

bidaia luzeegia

eta gaua ilunegia.

 

Familia babestuz

kanpoaldera erne eta temati begira.

Herioren sega zorrotza aldenduz

kanpoaldera erne eta temati begira.

Konturatu gabe

zure barrua zuela babesleku

arriskurik handienak,

heriok egunez egun

zorroztutako segarik mingarrienak.